FRAMTALSLEIÐBEININGAR 2013
7.13.2 Umsókn um skattalega heimilisfesti
Umsókn um skattalega heimilisfesti
Sækja þarf um skattalega heimilisfesti á eyðublaði RSK 3.26, sem fylgja skal skattframtali.
Vottorð um nám erlendis
Árlega þarf að leggja fram staðfestingu frá skóla þar sem fram kemur:
- hvaða nám var stundað og hve lengi á tekjuárinu
- hvenær nám hófst
- áætluð námslok
Upplýsingar um tekjur erlendis
Námsmaður og maki hans þurfa að leggja fram staðfestingu um tekjur eða tekjuleysi erlendis frá viðkomandi skattyfirvöldum. Nægilegt er að leggja fram:
- staðfest ljósrit af erlendum framtölum ef tekjur koma þar fram eða
- skriflegt tekjuvottorð frá erlendum skattyfirvöldum eða
- erlenda álagningarseðla eða staðfestingu á skattauppgjöri.
Einnig skal fylgja með framtali staðfesting á barnabótum eða sambærilegum greiðslum, fengnum erlendis á tekjuárinu.
Námsmenn erlendis fá ekki sent áritað framtal. Fyrir þá er því afar hentugt að telja fram á vefnum. Upplýsingar um vefframtalið og veflykla eru í kafla 1.8.2. Vilji þeir skila á pappír er hægt að prenta út öll fylgiskjöl með framtali á rsk.is eða snúa sér til skattstofu til að fá nauðsynleg eyðublöð. Á framtali þarf að koma fram póstfang námsmannsins erlendis eða umboðsmanns hér á landi og hvert hafi verið síðasta lögheimili námsmanns hér á landi.
Réttindi veitt í eitt ár í senn
Námsmaður sem óskar eftir að halda hér á landi skattalegri heimilisfesti þarf að sækja um það á framtali á hverju ári sem námið er stundað. Leggja þarf fram nýjar upplýsingar um námið á hverju ári ásamt staðfestingu frá skóla, tekjuvottorði frá skattyfirvöldum erlendis og staðfestingu um barnabætur erlendis.
Ríkisskattstjóri annast ákvörðun
Ríkisskattstjóri tekur ákvörðun um rétt námsmanns til að halda skattalegri heimilisfesti á Íslandi. Almennar reglur um kærur til skattyfirvalda gilda í þessum tilvikum. Ef ríkisskattstjóri fellst ekki á að veita skattalega heimilisfesti er skattlagning miðuð við takmarkaða skattskyldu, þ.e. námsmaðurinn er einungis skattlagður hafi hann haft tekjur hér á landi eftir að lögheimili hefur verið flutt frá landinu.