Skrá þarf inn stofnendur félagsins ásamt stofnframlagi hvers og eins. Eingöngu einstaklingar með íslenska kennitölu og rafræn skilríki geta stofnað félag með rafrænni fyrirtækjaskrá. Íslenskir lögaðilar þar sem stjórnarmenn/prókúruhafar eru með rafræn skilríki geta einnig stofnað félag með rafrænni fyrirtækjaskrá. Aðrir einstaklingar og lögaðilar þurfa að skila inn gögnum á pappír. Athygli er vakin á því í þessu sambandi að einstaklingar verða að hafa náð 18 ára aldri, vera lögráða og mega ekki hafa farið fram á né vera í greiðslustöðvun né bú þeirra vera undir gjaldþrotaskiptum.

Vinsamlegast hafið í huga að ekki er hægt að stofna félag nema stofnframlag stofnenda nái lágmarkshlutafé sem er 500.000 kr. Einnig verður hlutafé að hafa verið greitt til félagsins.

Sé hlutafé greitt í peningum þarf staðfestingu löggilts endurskoðanda eða skoðunarmanns að hlutafé hafi verið greitt til félagsins.

Ef hlutafé er greitt í öðru en reiðufé verður stjórn að gera skýrslu um greiðsluna sem staðfest er af löggiltum endurskoðanda eða lögmanni.

Hér á eftir er myndband sem fjallar um greiðslu hlutafjár.