Þú getur fengið greiddan út séreignarsparnað vegna launagreiðslna allt frá 1. júlí 2014 til þess dags sem þú undirritar kaupsamning um fyrstu íbúð í þinni eigu, eða þess dags sem nýbygging fær fastanúmer í fasteignskrá Þjóðskrár Íslands, í mest tíu ár. Hámark þess sem heimilt er að greiða út er 500.000 kr. á ári í samfellt tíu ár, eða 5.000.000 kr. yfir allt tímabilið. Þessar 500.000 kr. þurfa jafnframt að skiptast þannig að 333.000 kr. (4% framlag) séu þitt eigið iðgjald til séreignarsjóðsins og 167.000 kr. (2% framlag) frá launagreiðanda.

Ef þú hefur ekki náð að greiða í séreignarsjóð í samfellt tíu ár áður en þú kaupir þína fyrstu íbúð (talið lengst frá 1. júlí 2014) þá máttu taka út til kaupdags/skráningardags eignarinnar en eftir það er heimilt að ráðstafa framtíðariðgjöldum til greiðslu inn á veðlán. Samtals getur útborgun og greiðsla inn á veðlán tekið til iðgjalda af launagreiðslum í tíu ára samfellt tímabil.