Í þessum kafla skal gera grein fyrir erlendum hlutabréfum skv. eyðublaði RSK 3.19 Hlutabréfaeign – kaup og sala. Tilgreina skal nafn hlutafélags og í hvaða landi það er. Hlutabréfin skal eignfæra á nafnverði, en ef nafnverð er ekki þekkt skulu bréfin færð til eignar á kaupverði. Hafi verið greiddur skattur af arði erlendis skal gera grein fyrir því í athugasemdum í lið 1.4 á forsíðu framtals og láta fylgja með gögn því til staðfestingar. Unnt er að skila skönnuðum skjölum með vefframtali. Færa skal nafnverð og kaupverð hlutabréfa sem útgefin eru í erlendum gjaldmiðli á gengi eins og það var þegar hlutabréfin voru keypt.   Nafnverð og kaupverð er því óbreytt í krónutölu á milli ára meðan ekki er um kaup, sölu eða aðra breytingu á eignarhluta í félaginu að ræða.  Arð skal færa á kaupgengi þess tíma þegar hann var greiddur út.