Sá sem kaupir sína fyrstu íbúð getur sótt um útborgun á séreignarsparnaði fram að kaupmánuði, eða þeim mánuði sem eignin er skráð í fasteignaskrá Þjóðskrár Íslands ef um nýbyggingu er að ræða. Jafnframt er heimilt að sækja um að viðbótariðgjöldum í séreignarsjóð sé ráðstafað inn á lán sem tekin hafa verið og eru með veði í eigninni.

Ef sótt er um ráðstöfun viðbótariðgjalda til greiðslu inn á lán gildir umsóknin frá þeim tíma sem hún berst og tekur til iðgjalda af launagreiðslum frá og með þeim mánuði. Hámarksfjárhæð til greiðslu inn á veðlán er 500.000 kr. á almanaksári, með þeim skilyrðum sem um hana gilda. Á umsóknarári ákvarðast heimil fjárhæð í hlutfalli við það tímamark sem sótt er um. Sama verður þá einnig á síðasta ári ráðstöfunar.